स्वदेस न्यूज (प्रतिनिधी):-
आजची चांगली बातमी आहे मुंबईहून
विमानाची वाट पाहताना किंवा फ्लाइटला उशीर झाल्यानंतर प्रवासी अनेकदा मोबाईलमध्ये गुंतलेले दिसतात. मात्र, आता अशा प्रतीक्षेच्या वेळेचा उपयोग पुस्तक वाचनासाठी करता येणार आहे. भारतीय विमानतळ प्राधिकरण (AAI) आणि बकुळ फाउंडेशन यांच्या संयुक्त विद्यमाने सुरू करण्यात आलेल्या ‘फ्लायब्ररी’ (Flybrary) या अभिनव उपक्रमाचा विस्तार देशभरातील ६८ हून अधिक विमानतळांवर झाला आहे.
या उपक्रमांतर्गत विमानतळाच्या डिपार्चर लाउंजमध्ये खुल्या शेल्फवर विविध प्रकारची पुस्तके उपलब्ध करून देण्यात आली आहेत. प्रवाशांना कोणतेही शुल्क, कार्ड किंवा नोंदणी न करता आपल्या आवडीचे पुस्तक निवडता येते. प्रवासादरम्यान पुस्तकाचा आनंद घेतल्यानंतर गंतव्यस्थानी पोहोचल्यावर तेथील ‘फ्लायब्ररी’च्या शेल्फवर ते पुस्तक परत ठेवायचे असते.
फ्लायब्ररी’ही विश्वासावर चालणारी अनोखी संकल्पना आहे.
‘फ्लायब्ररी’चे सर्वांत महत्त्वाचे वैशिष्ट्य म्हणजे ही व्यवस्था कोणत्याही सिक्युरिटी लॉकर किंवा कठोर देखरेखीशिवाय प्रवाशांच्या विश्वास आणि प्रामाणिकपणावर चालते. पुस्तक घेताना कोणतेही शुल्क आकारले जात नाही आणि त्यासाठी कार्डचीही आवश्यकता नसते.
कथा, कादंबऱ्या, आत्मचरित्रे तसेच मुलांसाठीची पुस्तके अशा विविध प्रकारच्या साहित्याचा या उपक्रमात समावेश आहे. त्यामुळे विमानाच्या प्रतीक्षेतील वेळ अधिक आनंददायी आणि अर्थपूर्ण करण्याची संधी प्रवाशांना मिळते.
या उपक्रमाची आणखी एक विशेष बाब म्हणजे प्रवाशांना स्वतःची जुनी किंवा आवडती पुस्तके इतर वाचकांसाठी ‘फ्लायब्ररी’मध्ये दान करता येतात. त्यामुळे एका प्रवाशाने वाचलेले पुस्तक दुसऱ्या प्रवाशाच्या हातात पोहोचते आणि वाचनाची ही साखळी पुढे सुरू राहते.
प्रवासातील काही क्षण मोबाईलच्या स्क्रीनऐवजी पुस्तकाच्या पानांसोबत घालवण्याची संधी देणारा हा उपक्रम निश्चितच कौतुकास्पद ठरत आहे. पुढच्या वेळी विमानतळावर पोहोचलात, तर मोबाईल खिशात ठेवा आणि ‘फ्लायब्ररी’मधून एखादे पुस्तक हातात घ्या!
