स्वदेस न्यूज (प्रतिनिधी) :-
आजची चांगली बातमी आहे लडाखहून
लडाखमधील दुर्गम मुलबेख गावातून चित्रपटसृष्टीत आलेल्या तरुण दिग्दर्शक स्टॅन्झिन जिग्मेट यांनी आंतरराष्ट्रीय स्तरावर उल्लेखनीय यश मिळवले आहे. त्यांच्या ‘द ड्रॅगन लेटर’ या लघुपटाने ५३ व्या स्टुडंट अकॅडमी अवॉर्ड्समध्ये नॅरेटिव्ह श्रेणीत सुवर्णपदक पटकावले. या यशामुळे लडाखसह भारतीय चित्रपटसृष्टीच्या शिरपेचात आणखी एक मानाचा तुरा खोवला गेला आहे.
यंदाच्या स्टुडंट अकॅडमी अवॉर्ड्ससाठी जगभरातील ८९४ महाविद्यालये आणि विद्यापीठांमधून तब्बल २,९७२ लघुपट दाखल झाले होते. या जागतिक स्पर्धेतून जिग्मेट यांच्या ‘द ड्रॅगन लेटर’ची सुवर्णपदकासाठी निवड झाली. १४ सप्टेंबर २०२६ रोजी टोरोंटो येथे झालेल्या पुरस्कार सोहळ्यात विजेत्यांचा गौरव करण्यात आला.
‘द ड्रॅगन लेटर’ हा १४ मिनिटांचा लघुपट असून, लडाखमधील एका लाजाळू दहा वर्षांच्या मुलाची कथा त्यातून मांडण्यात आली आहे. परदेशातील एका प्रायोजकाला पत्र लिहिण्याचा प्रयत्न करणाऱ्या या मुलाच्या माध्यमातून बालपण, स्वप्ने आणि लडाखमधील सामाजिक वास्तवाचे चित्रण करण्यात आले आहे. या कथेला जिग्मेट यांच्या स्वतःच्या बालपणीच्या अनुभवांची प्रेरणा लाभली आहे.
या यशानंतर ‘द ड्रॅगन लेटर’ला आगामी ९९ व्या अकॅडमी अवॉर्ड्समधील लाइव्ह ॲक्शन शॉर्ट फिल्म श्रेणीत विचारासाठी पात्रता मिळाली आहे. स्टुडंट अकॅडमी अवॉर्ड्समधील विजेते चित्रपट ॲनिमेटेड शॉर्ट, लाइव्ह ॲक्शन शॉर्ट आणि डॉक्युमेंटरी शॉर्ट या तीन लघुपट श्रेणींसाठी विचारात घेतले जातात.
स्टॅन्झिन जिग्मेट यांनी चित्रपट निर्मितीचे प्राथमिक धडे युट्युब आणि ऑनलाइन ट्युटोरियल्सच्या माध्यमातून घेतले. त्यानंतर त्यांना स्पेनमधील बार्सिलोना येथील ESCAC फिल्म स्कूलमध्ये चित्रपट दिग्दर्शनातील पदव्युत्तर शिक्षणासाठी शिष्यवृत्ती मिळाली. ते लडाखस्थित ‘पिक्सेल चॅलेंजर फिल्म्स’ या प्रोडक्शन हाऊसचे संस्थापकही आहेत.
पुरस्काराची घोषणा झाल्यानंतर जिग्मेट यांनी सोशल मीडियावरील पोस्टमध्ये मुलबेख गावापासून अकॅडमीपर्यंतचा प्रवास अविश्वसनीय असल्याचे नमूद केले होते. हा पुरस्कार कुटुंब, मित्र, कलाकार, क्रू आणि आपल्या कथेवर विश्वास ठेवणाऱ्या सर्वांना समर्पित असल्याचे त्यांनी म्हटले.
