स्वदेस न्यूज (प्रतिनिधी):-
आजची चांगली बातमी आहे पुण्याहून
पुण्यात ‘शार्पनर’ या संस्थेच्या पुढाकाराने जगातील पहिले लहान मुलांचे अधिकृत ढोल-ताशा पथक सुरू होत आहे. महाराष्ट्राची पारंपरिक संस्कृती आणि ढोल-ताशा वादनाचा वारसा पुढच्या पिढीपर्यंत पोहोचवण्याच्या उद्देशाने या अनोख्या उपक्रमाची सुरुवात करण्यात आली आहे.
मुलांच्या कलागुणांना आणि व्यक्तिमत्त्वाला ‘शार्प’ करणाऱ्या ‘शार्पनर’ संस्थेने या आगळ्यावेगळ्या उपक्रमाची पायाभरणी केली आहे.या पथकात प्रामुख्याने शालेय लहान मुला-मुलींचा समावेश असेल, ज्यांना ढोल, ताशा आणि लेझीमचे शास्त्रशुद्ध प्रशिक्षण दिले जाईल. शार्पनर या लहान मुलांच्या ढोलपथकाचा सराव प्रामुख्याने पुण्यातील सदाशिव पेठ, राजेंद्र नगर आणि हिंगणे खुर्द (दामोदर नगर) या मध्यवर्ती भागात चालणार आहे. अनेक स्थानिक पथकांचे, विशेषतः नवोदित आणि मुलांच्या पथकांचे मुख्य सराव संकुल येथे आहे.
लहान मुलांची शारीरिक क्षमता लक्षात घेऊन त्यांच्यासाठी हलक्या वजनाचे ढोल तयार करण्यात आले आहेत. तसेच प्रशिक्षणादरम्यान त्यांच्या सुरक्षेची आणि शिस्तीची विशेष काळजी घेतली जाणार आहे. या ढोलपथकात सहभागी होण्यासाठी 30 जुलैपर्यत फॉर्म भरून देण्याची मुदत देण्यात आली आहे. अधिक माहितीसाठी शार्पनर को डॉट इन या बेबसाईटवर संपर्क साधण्याचे आवाहन करण्यात आले आहे.
ढोलताशात पुण्याच्या ऐतिहासिक ढोल-ताशा संस्कृतीमध्ये आता ही लहान मुले आपल्या वादनाने एक नवा अध्याय जोडणार आहेत. ज्यामुळे यंदाच्या गणेशोत्सवात बालगोपाळांचा हा अनोखा उत्साह पुणेकरांना अनुभवता येईल
