स्वदेस न्यूज (प्रतिनिधी) :-
आजची चांगली बातमी आहे नाशिकहून
आकड्यांशी खेळण्याची विलक्षण क्षमता, अफाट स्मरणशक्ती आणि वेगवान मानसिक गणिताच्या जोरावर नाशिकच्या आर्यन शुक्लाने जागतिक स्तरावर भारताचा गौरव उंचावला आहे. अवघ्या १६व्या वर्षी नऊ गिनीज वर्ल्ड रेकॉर्ड्स आणि दोन वेळा मानसिक गणना विश्वचषकाचे विजेतेपद मिळवणाऱ्या आर्यनला ‘ह्यूमन कॅल्क्युलेटर’ अर्थात ‘मानवी संगणक’ म्हणून ओळखले जाते. त्याच्या असामान्य बुद्धिमत्तेने आणि सातत्यपूर्ण कामगिरीने जगभरातील गणितप्रेमींचे लक्ष वेधून घेतले आहे.
आर्यनने मानसिक गणिताच्या सरावाला वयाच्या सहाव्या वर्षापासून सुरुवात केली. त्यानंतर कठोर सराव आणि जिद्दीच्या जोरावर त्याने आंतरराष्ट्रीय स्तरावर अनेक विक्रम प्रस्थापित केले. त्याने एकाच दिवसात मानसिक गणितातील सहा गिनीज वर्ल्ड रेकॉर्ड्स आपल्या नावावर केल्याची नोंद आहे.
दहा अंकी संख्यांच्या भागाकारासाठी अवघे २८.८१ सेकंद, तर १०० चार अंकी संख्यांची बेरीज ३०.९ सेकंदांत करण्याची त्याची क्षमता थक्क करणारी आहे. तसेच ५० पाच अंकी संख्यांची बेरीज त्याने अवघ्या २५.१९ सेकंदांत करून विश्वविक्रम नोंदवला. इटलीतील मिलान येथे झालेल्या ‘लो शो देई रेकॉर्ड’ या दूरचित्रवाणी कार्यक्रमात त्याने हा विक्रम केला.
आर्यनच्या यशातील महत्त्वाचा टप्पा म्हणजे मानसिक गणना विश्वचषकातील विजेतेपद. वयाच्या अवघ्या १२व्या वर्षी त्याने जर्मनीतील पाडरबॉर्न येथे झालेल्या स्पर्धेत विश्वविजेतेपद पटकावले. त्यानंतर २०२४ मध्येही त्याने ही कामगिरी पुन्हा करून आपले वर्चस्व सिद्ध केले. २०२४ च्या स्पर्धेत त्याने ९०० पैकी ८१९.८४ गुण मिळवले. दुसऱ्या क्रमांकावरील स्पर्धकापेक्षा मोठी आघाडी घेत त्याने स्पर्धेत ऐतिहासिक कामगिरी केली. तसेच विविध गणिती प्रकारांतील कौशल्याच्या जोरावर त्याने अनेक सुवर्णपदकेही जिंकली.
नाशिकमधील दिल्ली पब्लिक स्कूलचा विद्यार्थी असलेल्या आर्यनने शैक्षणिक वयातच आंतरराष्ट्रीय स्तरावर स्वतःची वेगळी ओळख निर्माण केली आहे. त्याच्या जागतिक स्पर्धेतील सहभागासाठी महाराष्ट्र शासनाने १० लाख रुपयांची प्रोत्साहनपर मदत जाहीर केली होती. आर्यनची यशोगाथा ही केवळ बुद्धिमत्तेची नव्हे, तर सातत्यपूर्ण सराव, एकाग्रता आणि जिद्दीची प्रेरणादायी कहाणी आहे. त्याच्या या उल्लेखनीय कामगिरीमुळे नाशिकसह संपूर्ण महाराष्ट्राची मान उंचावली असून, भारतीय तरुणाईच्या क्षमतेचे दर्शन जगाला घडले आहे.
