* ममता फाउंडेशनमध्ये रंगला विवाह सोहळा
स्वदेस न्यूज (प्रतिनिधी) :
आजची चांगली बातमी आहे पुण्याहून
जन्मतःच ‘एचआयव्ही’सारखा गंभीर आजार, कुटुंबाने साथ सोडल्याने अनाथ उपेक्षितच जगणे पदरी आले. मात्र, ममता फाउंडेशन संस्थेने आधार दिला, सांभाळ केला, शिक्षणही दिले. त्यामुळे स्वतःच्या पायावर उभे राहिलेले तरुण-तरुणी सुखी आनंदी आयुष्याची स्वप्ने साकारण्यासाठी लग्नबंधन स्वीकारून एकमेकांची साथ देण्यासाठी वचनबद्ध झाले.
ममता फाउंडेशनने आधार दिल्यानंतर आता या मुलांना समाजानेही पूर्णपणे स्वीकारले असल्याचे दिसून येत आहे. ‘एचआयव्ही’ बाधित अनाथ उपेक्षितांचा सांभाळ करून त्यांना स्वतःच्या पायावर उभे करण्यासाठी ममता फाउंडेशन संस्थेची स्थापना २००८ मध्ये डॉ. शिल्पा बुडूख आणि अमर बुडूख यांनी केली. सुरुवातीला भाड्याच्या जागेत सुरू असलेल्या संस्थेला माजी नगरसेवक प्रकाश कदम यांनी तीन गुंठे मोफत जागा दिली आणि संस्थेने स्वतःची इमारत उभारली. या संस्थेतील दोन जोडप्यांचा विवाह पारंपरिक पद्धतीने पार पडला. या संस्थेतील बधू रूपाली व वर महेश आणि वधू दिव्या व वर आकाश यांचा शुभविवाह नुकताच पारंपरिक पद्धतीने उत्साहात पार पडला.
हळद, मेंहदी, बॅन्डने वातावरण प्रसन्न झाले होते.
यावेळी ममता फाउंडेशनच्या संचालिका डॉ. शिल्पा बुडूख म्हणाल्या, अनाथ, उपेक्षितांना ममता परिवाराने हक्काचे घर दिले. अंगाखांद्यावर खेळवलेली माझी लेकरं आज विवाहबंधनात अडकली. कन्यादान सोहळा आनंदाश्रूनी पार पाडला. या सोहळ्यामुळे खऱ्या अथनि संस्था स्थापनेचे सार्थक झाले असल्याचे मला वाटत आहे. उपेक्षित म्हणून बेवारस झालेल्या लेकरांची माय मी यापूर्वीच झाले असून, आज मला सून आणि जावईदेखील आले आहेत.
या विवाह सोहळ्यास माजी नगरसेवक प्रकाश कदम, अभिनेत्री तेजस्विनी पंडित, अभिनेता जगन्नाथ निवंगुणे, माजी सरपंच दीपक गुजर, वरिष्ठ पोलिस निरीक्षक सावळाराम साळगावकर, संगीता यादव, शरद सोनवणे, आरोग्य निरीक्षक प्रमोद ढसाळ आदी उपस्थित होते. सूत्रसंचालन अॅड. दिलीप जगताप यांनी केले.
