स्वदेस न्यूज (प्रतिनिधी) :-
आजची चांगली बातमी आहे तेल अवीवहून
दुबईहून तेल अवीवकडे जाणाऱ्या फ्लायदुबईच्या FZ1073 या विमानात हवेतच अत्यंत थरारक प्रसंग घडला. विमान सुमारे ३३-३४ हजार फूट उंचीवर असताना कॉकपिटमध्ये कॅप्टन स्मित मच्छार यांच्यावर सह-वैमानिकाने हल्ला केला. या हल्ल्यात गंभीर जखमी होऊनही मच्छार यांनी प्रसंगावधान राखत कॉकपिटचा दरवाजा उघडला. त्यांच्या या कृतीमुळे प्रवासी आणि क्रू सदस्यांना आत प्रवेश करून हल्लेखोराला रोखता आले. या घटनेत विमानातील १७४ जण सुरक्षित बचावले.
हल्ल्यानंतर विमानाची उंची काही क्षणांत मोठ्या प्रमाणात खाली आली. उपलब्ध फ्लाइट-ट्रॅकिंग माहितीनुसार विमानाने सुमारे ३३ हजार फुटांवरून १७ हजार फुटांपर्यंत वेगाने घसरण केली. परिस्थिती नियंत्रणाबाहेर जाण्याची शक्यता असतानाच मच्छार यांनी जखमी अवस्थेत कॉकपिटचा दरवाजा उघडण्यास यश मिळवले.
त्यानंतर प्रवासी आणि क्रू सदस्यांनी हल्लेखोराला ताब्यात घेतले. विमानात असलेल्या इतर वैमानिकांनी नियंत्रणाची जबाबदारी स्वीकारत विमानाला सौदी अरेबियातील तबूक विमानतळाकडे वळवले. तेथे विमानाचे आपत्कालीन लँडिंग करण्यात आले.
हल्ल्यात कॅप्टन मच्छार गंभीर जखमी झाले. त्यांना तातडीने तबूक येथील रुग्णालयात दाखल करण्यात आले. भारतीय दूतावासाने त्यांना आवश्यक वैद्यकीय उपचार मिळत असून त्यांची प्रकृती स्थिर असल्याचे सांगितले आहे. या घटनेनंतर कॅप्टन स्मित मच्छार यांच्या धैर्याचे आंतरराष्ट्रीय स्तरावर कौतुक झाले. इस्रायलचे पंतप्रधान बेंजामिन नेतन्याहू यांनी त्यांच्या कृतीचे कौतुक करत त्यांना ‘खरा हिरो’ संबोधले. भारताचे पंतप्रधान नरेंद्र मोदी यांनीही त्यांच्या धैर्याचे कौतुक केले.
दरम्यान, सह-वैमानिकाने हल्ला का केला आणि या घटनेमागील नेमका हेतू काय होता, याचा तपास सुरू आहे. संबंधित देशांच्या यंत्रणा या प्रकरणाचा तपास करत असून, घटनेबाबत अधिकृत निष्कर्ष अद्याप समोर आलेला नाही. मात्र, गंभीर जखमी अवस्थेतही कॅप्टन मच्छार यांनी दाखवलेले प्रसंगावधान विमानातील १७४ जणांसाठी निर्णायक ठरले, हे या थरारक घटनेचे सर्वात महत्त्वाचे तथ्य ठरले आहे.
