सात सुवर्णपदकांसह भारतीय खेळाडुंनी २९ पदकांची केली लयलूट
स्वदेस न्यूज (प्रतिनिधी) :
आजची अभिमानास्पद बातमी आहे पॅरिसमधून
पॅरिसमधील पॅरालिम्पिक स्पर्धेच्या इतिहासात भारताने सर्वोत्तम कामगिरी केली आहे. यावेळी भारताने विक्रमी 29 पदके जिंकली. यामध्ये 7 सुवर्ण, 9 रौप्य आणि 13 कांस्य पदकांचा समावेश आहे. पदकतालिकेत भारत 18 व्या क्रमांकावर आहे.
भारताने पदकतालिकेत स्वित्झर्लंड, दक्षिण कोरिया, बेल्जियम आणि अर्जेंटिना या देशांना मागे टाकले. भारताने पॅरालिम्पिक स्पर्धेत आतापर्यंतची सर्वोत्तम कामगिरी केली असून यापूर्वीचे विक्रम मोडले आहेत. यापूर्वी पॅरालिम्पिक स्पर्धेत भारताची सर्वोत्तम कामगिरी टोकियोमध्ये झाली होती. टोकियो पॅरालिम्पिक 2020 मध्ये भारताने 5 सुवर्ण, 8 रौप्य आणि 6 कांस्य पदके जिंकली. त्यानंतर भारताने एकूण 19 पदकांसह 24 वे स्थान पटकावले होते. यावेळी भारताने ॲथलेटिक्समध्ये सर्वाधिक 17 पदके जिंकली, ज्यात चार सुवर्णपदकांचा समावेश आहे. पॅरा बॅडमिंटनमध्ये दुसऱ्या क्रमांकावर आहे, ज्यामध्ये भारताने एका सुवर्णासह 5 पदके जिंकली. तर पॅराशूटिंगमध्ये भारताने एका सुवर्णासह 4 पदके जिंकली. दुसरीकडे, भारताने पॅरा तिरंदाजीमध्ये एक सुवर्ण आणि पॅरा ज्युडोमध्ये 1 कांस्य पदकांसह 2 पदके जिंकली. पॅरालिम्पिक स्पर्धेत भारताने पहिल्यांदाच इतकी सुवर्णपदके जिंकली आहेत.
पॅरा ॲथलीट मुरलीकांत पेटकर यांनी 1972 मध्ये पॅरालिम्पिक स्पर्धेत भारताला पहिले पदक मिळवून दिले. मुरलीकांत पेटकर यांच्या जीवनावर नुकताच ‘चंदू चॅम्पियन’ हा चित्रपट आला आहे. नेमबाज अवनी लेखरा हिने पॅरिस पॅरालिम्पिक 2024 मध्ये भारतासाठीचे पहिले सुवर्णपदक जिंकले. यानंतर नितेश कुमार (बॅडमिंटन), सुमित अँटिल (ॲथलेटिक्स), हरविंदर सिंग (ॲथलेटिक्स), धरमबीर (ॲथलेटिक्स), प्रवीण कुमार (ॲथलेटिक्स) आणि नवदीप सिंग (ॲथलेटिक्स) यांनीही सुवर्णपदक जिंकण्यात यश मिळविले.
पॅरिस पॅरालिम्पिक 2024 मधील भारताचे पदक विजेते –
अवनी लेखरा (नेमबाजी) – सुवर्णपदक, महिला 10 मीटर एअर रायफल (SH1)
मोना अग्रवाल (नेमबाजी) – कांस्य पदक, महिला 10 मीटर एअर रायफल (SH1)
प्रीती पाल (ॲथलेटिक्स) – कांस्यपदक, महिलांची 100 मीटर शर्यत (T35)
मनीष नरवाल (नेमबाजी) – रौप्य पदक, पुरुष 10 मीटर एअर पिस्तूल (SH1)
रुबिना फ्रान्सिस (शूटिंग) – कांस्य पदक, महिला 10 मीटर एअर पिस्तूल (SH1)
प्रीती पाल (ॲथलेटिक्स) – कांस्यपदक, महिलांची 200 मीटर शर्यत (T35)
निषाद कुमार (ॲथलेटिक्स) – रौप्य पदक, पुरुष उंच उडी (T47)
योगेश कथुनिया (ॲथलेटिक्स) – रौप्य पदक, पुरुष डिस्कस थ्रो (F56)
नितीश कुमार (बॅडमिंटन) – सुवर्णपदक, पुरुष एकेरी (SL3)
मनीषा रामदास (बॅडमिंटन) – कांस्य पदक, महिला एकेरी (SU5)
तुलसीमती मुरुगेसन (बॅडमिंटन) – रौप्य पदक, महिला एकेरी (SU5)
सुहास एल यथीराज (बॅडमिंटन) – रौप्य पदक, पुरुष एकेरी (SL4)
शीतल देवी-राकेश कुमार (तिरंदाजी) – कांस्य पदक, मिश्र कंपाउंड ओपन
सुमित अंतिल (ॲथलेटिक्स) – सुवर्णपदक, पुरुष भालाफेक (F64 श्रेणी)
नित्या श्री सिवन (बॅडमिंटन) – कांस्य पदक, महिला एकेरी (SH6)
दीप्ती जीवनजी (ॲथलेटिक्स) – कांस्यपदक, महिला 400 मीटर (T20)
मरियप्पन थांगावेलू (ॲथलेटिक्स) – कांस्य पदक, पुरुष उंच उडी (T63)
शरद कुमार (ॲथलेटिक्स) – रौप्य पदक, पुरुष उंच उडी (T63)
अजित सिंग (ॲथलेटिक्स) – रौप्य पदक, पुरुष भालाफेक (F46)
सुंदरसिंग गुर्जर (ॲथलेटिक्स) – कांस्यपदक, पुरुष भालाफेक (F46)
सचिन सर्जेराव खिलारी (ॲथलेटिक्स) – रौप्य पदक, पुरुष शॉटपुट (F46)
हरविंदर सिंग (तिरंदाजी) – सुवर्ण पदक, पुरुष वैयक्तिक रिकर्व्ह ओपन
धरमबीर (ॲथलेटिक्स) – सुवर्णपदक, पुरुषांचा क्लब थ्रो (F51)
प्रणव सुरमा (ॲथलेटिक्स) – रौप्य पदक, पुरुष क्लब थ्रो (F51)
कपिल परमार (जुडो) – कांस्य पदक, पुरुष 60 किलो (जे1)
प्रवीण कुमार (ॲथलेटिक्स) – सुवर्णपदक, पुरुष उंच उडी (T44)
होकाटो होतोजे सेमा (ॲथलेटिक्स) – कांस्य पदक, पुरुषांचा शॉट पुट (F57)
सिमरन शर्मा (ॲथलेटिक्स) – कांस्यपदक, महिला 200 मीटर (T12)
नवदीप सिंग (ॲथलेटिक्स) – सुवर्णपदक, पुरुष भालाफेक (F41)
