राणी एलिझाबेथनंतर उच्च सन्मान मिळणारे पहिलेच व्यक्ती
स्वदेस न्यूज (प्रतिनिधी) :
आजची चांगली बातमी आहे दिल्लीतून…
नायजेरियाने पंतप्रधान नरेंद्र मोदी यांना ग्रँड कमांडर ऑफ द ऑर्डर ऑफ द नायजर या पुरस्काराने सन्मानित करण्यात आले आहे. यापूर्वी हा पुरस्कार राणी एलिझाबेथ यांना मिळाला होता. १९६९ मध्ये त्यांना हा सन्मान देण्यात आला होता.
नायजेरियाचे राष्ट्रपती होला अहमद टिनुबू यांनी राजधानी अबुजा येथे एका भव्य समारंभात पंतप्रधान मोदींचा सन्मान करण्यात आला.
हा सन्मान स्वीकारताना पीएम मोदी म्हणाले, ‘मी नम्रपणे 140 भारतीयांना आणि भारत आणि नायजेरियाच्या मैत्रीला समर्पित करतो. यासाठी मी नायजेरिया सरकार आणि नायजेरियातील नागरिकांचे आभार मानतो.
पंतप्रधान मोदी यांचा 17 वा सर्वोच्च नागरी सन्मान
पंतप्रधान मोदींना परदेशी सरकारने दिलेला हा 17वा सर्वोच्च नागरी सन्मान आहे. जगातील सर्वाधिक परदेशी सन्मान मिळालेले जागतिक नेते म्हणून त्यांची ओळख आता होत आहे. पंतप्रधान नरेंद्र मोदी दोन दिवसांच्या नायजेरिया दौऱ्यावर शनिवारी संध्याकाळी पोहोचले. 17 वर्षांनंतर भारतीय पंतप्रधानांची ही पहिलीच नायजेरियाला भेट होती, ज्याचा पंतप्रधान मोदींनी आपल्या भाषणात उल्लेख केला.
त्यांनी रविवारी राष्ट्राध्यक्ष टिनुबू यांच्याशी द्विपक्षीय चर्चा केली, ज्यामध्ये द्विपक्षीय संबंधांच्या सर्व आयामांवर तपशीलवार चर्चा करण्यात आली.
द्विपक्षीय बैठकीत संबंध दृढ करण्यावर भर
नायजेरियाच्या राष्ट्रपतींसोबतच्या द्विपक्षीय बैठकीबाबत पीएम मोदी म्हणाले, ‘नायजेरियासोबतचे संबंध मजबूत करणे ही भारतासाठी महत्त्वाची प्राथमिकता आहे. आमचे परस्पर संबंध अधिक दृढ आणि विस्तारित करण्याबाबत आम्ही बोललो ही आनंदाची बाब आहे. अर्थशास्त्र, ऊर्जा, कृषी, सुरक्षा, फिनटेक, लघु आणि मध्यम उद्योजकता आणि संस्कृती या क्षेत्रात नवीन शक्यता निर्माण होत आहेत. दोन्ही देश आणि आफ्रिकन खंडातील लोकांसाठी समृद्धी सुनिश्चित करण्यासाठी भारत आणि नायजेरियाला जवळची भागीदारी सुनिश्चित करावी लागेल.
परराष्ट्र मंत्रालयाने जारी केलेल्या माहितीत म्हटले आहे की, मोदी आणि टिनुबू यांच्यात दहशतवाद आणि कट्टरतावादाच्या विरोधात सहकार्याबाबतही चर्चा झाली. संरक्षण आणि सुरक्षा ही दोन क्षेत्रे आहेत ज्यात दोन्ही देशांना प्रचंड क्षमता आहे.
भारताने अनेक क्षेत्रात मदतीचा दिला प्रस्ताव
भारतीय पंतप्रधानांनी नायजेरियाला स्वस्त औषधे, कृषी, वाहतूक, नवीकरणीय ऊर्जा आणि डिजिटल परिवर्तन या क्षेत्रात पूर्ण मदत देण्याचा प्रस्ताव ठेवला आहे. भारताकडून मिळालेल्या मदतीबद्दल आणि भारतीय कंपन्यांच्या गुंतवणुकीबद्दल अध्यक्ष टिनुबू यांनी आभार मानले. ते म्हणाले की, भारताने शिक्षण, आरोग्य आणि सरकारच्या क्षमता वाढवण्यासाठी दिलेल्या मदतीचा परिणाम दिसून येत आहे. भारत आणि नायजेरिया यांच्यात तीन करारही झाले आहेत. हे सांस्कृतिक देवाणघेवाण, सीमाशुल्क सहकार्य आणि सर्वेक्षण सहकार्याबद्दल आहे
नायजेरियात मराठी बांधवांकडून मोदींचे आभार
दरम्यान, मराठी भाषेला अभिजात भाषेचा दर्जा मिळाल्याबद्दल नायजेरियात राहणाऱ्या मराठी बांधवांनी आनंद व्यक्त केला. याबद्दल नायजेरियातील महाराष्ट्र मंडळाने पंतप्रधान नरेंद्र मोदी यांचे आभार मानले आहे. हा निर्णय मराठी भाषिकांसाठी अत्यंत अभिमानाचा आहे. यामुळे मराठी साहित्य आणि संस्कृतीला प्रोत्साहन मिळेल, असे आभाराचे पत्र महाराष्ट्र मंडळ, नायजेरियाचे विश्वस्त रमेश गाडगे यांनी पंतप्रधान नरेंद्र मोदी यांना लिहिले आहे.
