स्वदेस न्यूज (प्रतिनिधी) :
आजची चांगली बातमी आहे पुण्यातून
भारतातील अब्जाधीशांमध्ये आता एक नवे नाव जोडले गेले आहे. ते म्हणजे पुण्यातील प्रख्यात ज्वेलर्स असलेल्या पु. ना. गाडगीळ ज्वेलर्सचे सर्वेसर्वा असलेल्या सौरभ गाडगीळ यांचे. पीएनजीचा आयपीओ शेअरबाजारात दाखल केल्यानंतर अवघ्या महिन्याभरात त्यांनी ही मजल मारलेली आहे.
पीएन गाडगीळ ज्वेलर्सच्या शेअर्समध्ये गेल्या महिन्यात कंपनीच्या IPO नंतर ६१ टक्क्यांनी वाढ झाली आहे. ब्लूमबर्ग बिलियनेअर्स इंडेक्सनुसार, IPO पासून सौरभ गाडगीळ यांची एकूण संपत्ती १.१ बिलियन डाॅलर्सपेक्षा जास्त झाली आहे. त्यामुळे आता अब्जाधीशांच्या यादीमध्ये पुण्यातील एक मराठमोळे नाव जोडले गेले आहे.
सौरभ गाडगीळ यांचा जन्म पुण्यामध्ये झाला. ४७ वर्षीय सौरभ गाडगीळ यांनी दागिन्यांचा पिढीजात व्यवसाय सांभाळलेला आहे. सौरभ गाडगीळ हे विद्याधर गाडगीळ यांचे चिरंजीव आणि पीएन गाडगीळ ज्वेलर्सच्या पुणे युनिटचे संस्थापक दाजीकाका यांचे नातू आहेत. सौरभ गाडगीळ हे सहाव्या पिढीतील व्यावसायिक आहेत. पारंपरिक कौटुंबिक व्यवसायाला त्यांनी नवी दिशा दाखवली आहे.
सौरभ गाडगीळ यांचे शिक्षण
सौरभ गाडगीळ यांनी १९९८ मध्ये बृहन महाराष्ट्र कॉलेज ऑफ कॉमर्स, पुणे येथून बॅचलर ऑफ कॉमर्स (BCom) पदवी घेतली. नंतर त्यांनी टेक्सास, ऑस्टिन, टेक्सास (यूएसए) विद्यापीठातून यांत्रिक अभियांत्रिकीमध्ये पीएचडी पूर्ण केली. तसेच त्यांनी रिझर्व्ह बँक ऑफ इंडिया (RBI) मध्ये इंटर्नशिपही केली. या ठिकाणी सौरभ यांनी कौटुंबिक व्यवसायाविषयी अधिक माहिती मिळविण्यासाठी सोन्याच्या बाजाराचा बारकाईने अभ्यास केला. शैक्षणिक आणि व्यावसायिक कामाव्यतिरिक्त ते एक कुशल बुद्धिबळपटूदेखील आहेत. त्यांनी अनेक राज्यस्तरीय स्पर्धांमध्ये सहभाग घेतला आहे.
१८३२ मध्ये स्थापना
पी. एन. गाडगीळ ज्वेलर्स लिमिटेड ही भारतातील सर्वात जुन्या ज्वेलरी कंपन्यांपैकी एक आहे. याची स्थापना गणेश नारायण गाडगीळ यांनी १८३२ मध्ये केली होती. सुरुवातीला गणेश गाडगीळ सांगलीतील फूटपाथवर सोन्याचे दागिने विकायचे. नंतर त्यांनी पी. एन. गाडगीळ ज्वेलर्सची स्थापना केली. आज पी. एन. गाडगीळ ज्वेलर्सची महाराष्ट्र आणि गोव्यात ३९ रिटेल स्टोअर्स आहेत. तसेच कॅलिफोर्नियातही एक दुकान आहे.
