७० व्या राष्ट्रीय चित्रपट पुरस्कारांत मराठीचा डंका!...

‘वाळवी’ला सर्वोत्कृष्ट मराठी चित्रपटाचा बहुमान

‘वारसा’ माहितीपट ठरला सर्वोत्कृष्ट!

स्वदेस न्यूज (प्रतिनिधी) :

आजची चांगली बातमी आहे, थेट दिल्लीहून…

मनोरंजन क्षेत्रात महत्त्वाच्या मानल्या जाणाऱ्या राष्ट्रीय चित्रपट पुरस्कारांमध्ये सर्वोत्कृष्ट मराठी चित्रपटाचा बहुमान ‘वाळवी’ या चित्रपटाला प्राप्त झालेला आहे. राष्ट्रीय पुरस्कारांच्या मालिकमध्ये मराठी चित्रपटाचा डंका वाजतो आहे ही अर्थातच प्रत्येक मराठी रसिकासाठी अतिशय आनंदाची बाब आहे. या शिवाय, कोल्हापूरचे दिग्दर्शक आणि निर्माते सचिन बाळासाहेब सूर्यवंशी यांच्या ‘वारसा’ या माहितीपटाला सांस्कृतिक चित्रपट विभागात सर्वोत्कृष्ट माहितीपटाचा पुरस्कार जाहीर झाला आहे.

दिल्लीमध्ये ७० व्या राष्ट्रीय पुरस्कारांची घोषणा करण्यात आली. त्यामध्ये अन्य भाषिक चित्रपटांच्या जोडीला मराठीनेही आपले स्थान राखून ठेवले असल्याचे दिसून आले. गेल्या काही वर्षांत मराठीमध्ये अनेक चांगले वेगळ्या धाटणीचे चित्रपट येऊ लागले आहेत. नेहमीच्या चौकटीबद्ध अशा मराठी पटकथांना दूर सारून वेगळ्या विषयांना स्पर्श करणारे चित्रपट करण्याकडे मराठी दिग्दर्शक वळू लागले आहेत ही अर्थातच चांगली बाब आहे.

‘वाळवी’ हा चित्रपट परेश मोकाशी यांनी दिग्दर्शित केलेला असून चांगल्या चित्रपटांच्या दिग्दर्शनात त्यांचा हातखंडा असून त्यांनी आपले स्थान वेगळे निर्माण केले आहे. परेश मोकाशी हे भारतीय सिने-दिग्दर्शक, अभिनेते व रंगमंच दिग्दर्शक आहेत. मोकाशी ह्यांनी आजवर हरिश्चंद्राची फॅक्टरी, एलिझाबेथ एकादशी या दोन मराठी चित्रपटांचे दिग्दर्शन आणि अनेक नाटकांचे देखील दिग्दर्शन केले आहे. ७० व्या राष्ट्रीय चित्रपट पुरस्कार २०२४ साठी १ जानेवारी २०२२ ते ३१ डिसेंबर २०२२ या कालखंडात सेंट्रल बोर्ड ऑफ फिल्म सर्टिफिकेशन म्हणजेच CBFC द्वारे प्रमाणित फीचर आणि नॉन-फीचर चित्रपटांचा समावेश होता. या मध्ये अन्य भाषांमध्ये मल्ल्याळम चित्रपट ‘अट्टम’ने बाजी मारत सर्वोत्कृष्ट चित्रपटाच्या राष्ट्रीय पुरस्कारवर आपलं नाव कोरलं आहे. तर, सर्वोत्कृष्ट कन्नड सिनेमा म्हणून ‘केजीएफ चाप्टर २’ ची निवड करण्यात आली आहे. ‘कांतारा’ चित्रपटासाठी कन्नड अभिनेता ऋषभ शेट्टीला सर्वोत्कृष्ट अभिनेत्याचा पुरस्कार जाहीर झाला. सर्वोत्कृष्ट अभिनेत्रीचा पुरस्कार दोन अभिनेत्रींना विभागून देण्यात आला आहे. तामिळ चित्रपट ‘तिरुचित्रम्बलम’साठी नित्या मेननला सर्वोत्कृष्ट अभिनेत्रीचा पुरस्कार देण्यात आला आहे. हा चित्रपट 2022 मध्ये प्रदर्शित झाला होता. या चित्रपटात धनुष मुख्य अभिनेता होता. ‘कच्छ एक्सप्रेस’ या गुजराती चित्रपटासाठी मानसी पारखेला सर्वोत्कृष्ट अभिनेत्रीचा पुरस्कार देण्यात आला आहे.

मनोज वाजपेयी आणि शर्मिला टागोर यांच्या ‘गुलमोहर’ चित्रपटाला ‘बेस्ट हिंदी फिल्म ऑफ द ईयर’ पुरस्कार मिळाला आहे. ‘उंचाई’ चित्रपटासाठी निर्देशक सूरज बडजात्या यांना सर्वोत्कृष्ट दिग्दर्शक पुरस्कार मिळाला आहे. कार्तिकेय – 2 चित्रपटाला ‘बेस्ट तेलुगू फिल्म’चा पुरस्कार मिळाला आहे. ‘पोन्नियन सेलवन-1’ या चित्रपटाला ‘बेस्ट तमिळ फिल्म’चा पुरस्कार मिळाला असून ‘केजीएफ ‘मुरमूर्स ऑफ द जंगल’ या मराठी डॉक्युमेंट्रीने, सर्वोत्कृष्ट डॉक्युमेंट्री आणि सर्वोत्कृष्ट निवेदक असे दोन महत्त्वाचे पुरस्कार मिळवले आहेत. चॅप्टर 2’ ला ‘बेस्ट कन्नड फिल्म ऑफ’चा पुरस्कार मिळाला आहे. ब्रह्मास्त्र- पार्ट 1 या चित्रपटातील गाण्यांसाठी संगीतकार प्रीतम यांना उत्कृष्ट संगीत दिग्दर्शक हा पुरस्कार देण्यात आला आहे. पोन्नियन सेलवन- पार्ट 1 या तमिळ चित्रपटाच्या पार्श्वसंगीतासाठी ए. आर. रहमान यांना उत्कृष्ट संगीत दिग्दर्शक पुरस्कार मिळाला आहे. अरिजित सिंहला ब्रम्हास्त्र-पार्ट 1 या चित्रपटातील ‘केसरिया’ गाण्यासाठी सर्वोत्कृष्ट पुरुष गायकाचा राष्ट्रीय पुरस्कार जाहीर झाला आहे.

वाळवी चित्रपटाला प्रेक्षकांची चांगली पसंती मिळाली होती. या चित्रपटाची कथा आणि त्याचा क्लायमॅक्स अनेकांना धक्कादायक वाटला होता. त्यावर खूप चर्चादेखील झाली होती. मराठीतील हा एक वेगळाच प्रयोग असल्याचे त्यावेळी बोलले गेले होते.

‘वाळवी’ चित्रपटाला पुरस्कार जाहीर झाल्याचा खूप आनंद आहे, अशी भावना चित्रपटाचे दिग्दर्शक परेश मोकाशी यांनी व्यक्त केली. हा पुरस्कार माझा एकट्याचा नसून संपूर्ण टीमचा आहे अशी प्रांजळ भावना त्यांनी यावेळी व्यक्त केली.